فضفضه
بسم الله الرحمن الرحيم
انا دلوقتى قاعد على الكومبيوتر فاتح برنامج الورد وبكتب ومش عارف بصراحه هكتب ايه
بس جوايا رغبه كبيره بالكتابه عايز انطق واقول انا مخنوق زهقان مضايق ومبسوط وفرحان
مجنون انا مش فاهم نفسى ولا عارف عايز ايه من الدنيا خنقانى جدا حاسس انها ضيقه
لاء لاء انا اللى بضيقها على نفسى ..اكتر من مره اقول نفسى اتوب لربنا اتوب
وبعد كده ارجع للى كنت فيه فالاول التوبه بتاعتى مش كامله وفيها شىء مهمه ناقصها
بدور عليه تملى مش لاقيه وبجد تعبت وقرفت من حالى
الحال العام لبلدنا الحبيبه مصر مش كويس ومش مبشر (ده صوت جوه منى طبعا)
الصوت التانى بيقول انت لا تملك بكره ازاى تفكر فيه وانت مش هتعيشه
ازاى احقق المعادله الصعبه .ازاى اعيش النهارده فاليوم اللى انا فيه ومفكرش فبكره
طيب هل الاحلام والطموح حرام . طيب ازاى اقاوم اغراءات الدنيا ..ازاى مهما اشوف
حواليا من فلوس وعربيات وبنات والخ الخ من الشهوات وافتكر ربنا واسمع الاذان لو وسط الف
ازاى قلبى يبقى معلق بالمساجد..ازاى اقدر امنع نفسى من جريمه الزنا (اعوذ بالله منها) لو تهيأت
انا نفسى ضعيفه ..شايف كل الحياه فلوس وبس ماديه اوى ولذلك ضيقه اوى بفكر انى اشتغل
بس الواقع مش مهيأ ده ليا ..مشكله حياتى ان تفكيرى تفكير مادى رغم انى مش شحات ولا فقير
مستور زى ناس كتير وبلبس احلى لبس وباكل احسن اكل بس عايز اكتر عايز اكتر واكتر
ايه الحل ..حل ايه ؟!..المشكله ايه اساسا؟!!..ايه النقص اللى فحياتى
التوبه
برجع لربنا بس بنشغل فالحياه تانى وبحس انها صعبه وتقيله على قلبى
مش بحبها بكرها وبمقتها وطمعان اوى فيها وماسك فيها بايدى وسنانى
بقول انى بحب ربنا وبالرغم من ذلك بعيد عنه اوى ومش بطيعه والله حرام عليا
لو ربنا سألنى انت تستحق الجنه ؟! هرد بأيه ! لسانى غصب عنه هيقول لاء
لا والله يارب مستحقهاش
ولو قالى تستحق النار
كل ذره فجسمى هتنطق اه ولسانى هيقف ومش هيتكلم
معادله صعبه جدا جدا جدا
الشيوخ واصحاب الدين والناس اللى فاهمه الدين صح عندهم العلاج
لانهم عارفين الداء
بس تحقيق العقار لشفاء المريض صعب اوى
النيه موجوده
بس العقبات كتيره اوى اوى اوى
هل انا اللى بصعبها على نفسى
هل ده حالى انا وحدى ؟!
ولا حال ناس كتير غيرى وزى؟!
بحبك يارب
وعشمى فيك كبير جدا جدا جدا
ساعدنى انى اطيعك
ابعدنى عن الشهوات يارب العالمين
انا ضعيف جدا جدا جدا
ولازم هرجعلك
انا عارف انها بتضيق عليا عشان ارجعلك عشان انت بتحبنى
يارب مش عارف ادعو واقول ايه
انت عالم بنيتى
يارب ساعدنى
وخد بايديى
الثلاثاء 4 ديسمبر 2007 - 15:15
