ايه اهم شىء فحياتنا

السلام عليكم يا احلى واجمل شباب يارب يكون موضوعنا وهدفنا المره دى هدف يرقى لفكر الكثير منا ويوصلهم المعنى بالشكل المطلوب


النهارده جايب سؤال صغير اوى بيقول ايه اهم شىء فحياتنا ؟ ايه الشىء اللى كلنا عايزينه وشايفينه انه هيحقق كل طموحاتنا فالدنيا دى ؟

هل هوه ( الحب...الشهره...الفلوس...المنصب.)


اربع حاجات لقيت ان معظم الشباب بيدور عليها منهم انا

بس فالحقيقه لقيت ان الاربعه بيمثلوا شكل من اشكال فساد العقل لدى الشاب

ليه بيمثلوا شكل من اشكال الفساد ؟

الحب يا جماعه مفهوم بشكل غربى بحت تتخلله بعض من العادات الشرقيه

البنت دلوقتى فالوطن العربى هتقولك انا ليا بوى فريند والله لو سمعت اختى بتقول كده

انا كنت اموتها من الضرب ..وطبعا هيه مش هتقول كده

فيه ناس تقولك اصل انت متخلف وراجعى ومش حضارى

سبحان الله هوه انا عشان ارضى الناس اضيع اختى ..واضيع عرضى ودينى

يقولك لاء اصل هيه لو واثقه فنفسها يبقى خلاص بقى انت عايز ايه

مين فينا لو اجتمع ببنت فى مكان واحد مش هيتحرك شىء جواه ومش هيفكر بشكل

او باخر فى تكرار الفرصه دى حتى لو محصلتش ..وياعالم لو حصلت ايه يجرى

انا اللى مش بقبله على نفسى مش هقبله على غيرى لو طبقنا المبدا ده اكيد

هنرتاح ونريح نفسنا من حاجات كتير

زميله عزيزة ليا فمنتدى اخر قالتلى يا محمود ما انتوا اللى عايزين تمشوا مع دى ومع دى ومع طوب الارض وفالاخر تلفوا على بنت ملهاش اى علاقه سابقه

عندها حق ولذلك انا بلوم الشباب قبل البنات

العلاقه بين الرجل والمراه مبنيه على اساس الحب والرغبه وفنفس الوقت

وصعب نفصل بين الاتنين ولذلك نلاقى مثلا اتنين كانوا بيحبوا بعض اوى قبل الجواز

ممكن يطلقوا بعض الجواز بسبب خلافات الازواج اللى احنا عارفنها الا من عفى عنه الله

مش هنتطرق الى الحديث عن الرغبات والغرائز الانسانيه احتراما للمنتدى الفاضل

ويارب متكونش الكلمات البسيطه دى عبرت عن شىء خاطىء

انا وصفت حال الحب بين اغلب شبابنا العربى لكن ده ميمنعش ان فيه ناس عارفه يعنى ايه حب بس صدقونى يا جماعه قصص الحب بتاعتنا بتاعه اليومين دول فاشله
جدا جدا جدا لا تؤتى بثمارها فى اغلب الاحيان

انا بقول لنفسى لما اقدر افتح بيت واحقق احلامى هفكر احب واتجوز واستقر وكل حاجة حلوة تيجى بعد ما اتعب واشتغل عشان حرام اللى بنعمله فنفسنا
لما بنحب اول مره مش بتكون زى التانيه مش زى التالته اكيد كل مره الشخص اللى سبناه او سابنا بياخد حته من قلبنا معاه لحد ما يجى الشخص اللى يقدرنا ونتجوزه وافالاخر مش بنعرف نعيش معاه لان لا يعطى الشىء فاقده واحنا كده بنفقد المعنى الحقيقى للحب

الحاجة التانيه المنصب

المنصب ياجماعه معظمنا بيبحث عنه اعتقادا منا ان المكانه الاجتماعيه والواجهه بتاعتنا

بتكو ن احلى وارقى وعلاقتنا بتبقى اوسع ونقدر نخلص فحاجات كتير

مع ان المنصب فوجهه نظرى هو من اكبر الاختبارات واكبر المصائب اللى بتصيب الانسان على مر الحياه

لان المنصب يعنى المسئوليه يعنى انت اصبحت مسئول عن ناس تحت منك وهتتسال عنهم يوم الحساب

والسؤال رده صدقنى هيكون صعب على صاحب المنصب قوى اذا كان الخليفه عمر رضى الله عنه قال لو ناقه تعثرت فى ارض العراق لسؤلت عنها

ما بالك انت بتتسال عن بنى ادم

الشباب لو عارف هوه هيعمل ايه فمنصبه يمسكه لما تيجى الفرصه لو مش عارف يبعد لانه هيندم بعدين

احيانا واحد يبقى نفسه يطلع ظابط ولما يطلع ظابط يطيح فالناس ويضرب فالناس زى ما بنشوف يضمن منين ميكونش اللى ضربه ده حد ميعرفش يمسك اعصابه ويصر على الانتقام منه ويقتله مش ده وارد يا جماعه

من هنا وجهت لنفسى رساله وفكرت نفسى بأن ربنا لا يكلف نفسا الا وسعها

فلو هقدر اكون معطاء فى هذا الشغل وهذا المنصب همسك فيه بايدى وسنانى عشان اخدم الناس اللى انا واحد منهم وفيوم هتاجلهم ان مكنش فالدنيا صدقنى هيبقى فالاخره

تالت شىء الشهره

الشهره مرض انا ذات نفسى بحب الشهره جدا بحب ان كل الناس تبقى عارفانى زى بقيت الناس بتحب تسمع اسمها تملى بس لما يزيد عن الحد وابقى نفسى ابقى مثلا فشهره كذا او كذا يبقى انا ماشى فطريق غلط لان كتير من الناس قدروا يقدموا للحياه دون البحث وراء الذات بل ابتغاء لوجه الله تعالى وخير دليل على ذلك الشيخ الشعراوى رحمه الله امام الدعاه الجميل


رابع حاجة والاخيره وانا مش عايز اطول جدا الفلوس

الفلوس وسيله كلنا بنحتاجها وانا بدعى ربنا يرزقنى ملايين الجنيهات عشان احقق كل احلامى بس هل لو تاخر الرزق ولا حتى مجاش معناه انى اكفر معناه انى اجحد ولا احمد

طبعا لاء وعسى ان تكرهوا شيئا وهوه خيرا لكم

هوه حال الدنيا كده فيه ناس ربنا بيغنيها من عنده عشان ميفسدش حالهم وناس ربنا بيحجب عنهم كثر الاموال لان قلتها احسن بالنسبه لهم

دلوقتى كلنا بنسعى وراء الفلوس الكتير وباسرع وقت وانا كده بس انا بتكلم لصحابى الشباب عسى ان ربنا يثبتنا كلنا على دين الاسلام وياخد بايديى وانا بحاول اطلع من اللى انا فيه

الفلوس مش كل شىء لانها احيانا بتخلينا نخسر كتير

الاب اللى سافر بره البلد يشتغل ويجدح من اجل عياله ومقعدش معاهم الا شهر كل سنه تفتكروا انه كده صح وانه مش هيتسال عنهم

التربيه الصحيحه انك تزرع الاخلاق والدين جوة ابنك وتسيبه هوه يتوكل على الله ورزقه موجود لكن احيانا تقول طيب ما انا امن مستقبل عيالى ازاى تأمن شىء انت لا تملكه افرض وانت فالغربه ابنك مات وهوه بيشرب مخدرات احساسك هيبقى ايه

يا جماعه انا مش بذكر الحاجات الوحشه عشان انا مش شايف غيرها

لكن تعالوا نتكلم بجد الحاجات دى موجوده بكثره وعايزين نقضى عليها

واحده واحده نصلح حاجة فحاجة هنلاقى حياتنا افضل واجمل واعمق

ربنا يهدينى ويهدي كل صحابى وشباب المسلمين ويارب نفكر فربنا بشكل اكبر يا جماعه ونطبق الصلاه اللى بنصليها والقران اللى بنسمعه حق التطبيق عشان نتعدل

مع السلامه

محمود نصير